Fikmin #Reuni#

Ret deui manehna kana arloji. Geus liwat satengah jam tinu waktu nu dijangjikeun. Telepon deui kitu? Teu kudu lah, da tadi ge Si Mamih sakitu jentrena, jam dalapan cenah. “Pokona  nu  ieu mah mantab we Bos, Janda Kembang…dijamin serpis memuaskan” kitu ceuk si Mamih teh. Nyebut janda kembang teh ras ka anakna nu cikal S Erni, geus sataun cenah rarandaan lantaran salakina ngancrud. Geus meh tilu taun manehna teu panggih jeung anakana sabada  ngilu  jeung pamajikanana nu geus dipirak lan taran kapanggih salingkuh jeung anak buahna. Teu kungsi lila aya nu ngetrok kana panto hotel bari dituturkeun ku sora halimpu “Selamat  malam. Om” bari bray panto muka, belenyeh awewe sampulur make baju ngepas pulas buereum. Ngan sajorelat eta imut awewe sampulur the    ngoceak . “Papihhhhh……” cenah bari ngagabrug. Manehna olohok bari istigfar. “Erni…!!.” Les kapiuhan.

Fikmin #Boneka#

“Mun uih nyanadak boneka kanggo Ima nya , Pa !”. Bapana nyampeurkeun, tuluy ngusapan buukna. Geus kitu mah bapana indit , norobos simpena peuting. Ti harita Ima remen nanyakeun ka indungna, iraha bapana balik, manehna hayang geura boga boneka, manehna hayang geura sare di barengan ku boneka. “Sabar …nya” kitu jawaban indungna. Teuing geus sabaraha puluh kali saban nanyakeun bapana jeung boneka ukur di jawab sabar. Bapana euweuh bejana, can karuhhan iraha datangna. Nu aya teh dua urang lalaki turun tina mobil tuluy ngobrol jeung indungna. Ti saprak  kadatangan tamu eta, saban ditanyakeun iraha bapa balik indungna kalah ceurik bari ngusapann buukna. Kadieu nakeun Ima kakaranya nyaho  yen cenah nu datang teh pulisi. Nya ti harita bapana teu datang deui. Harepan yen bapana bakal datang mawa  boneka tetep aya dina implengan Ima.

Man tarokkaa….

Mangsa keur budak  , imah kuring teh deukeut ka masjid. Bada magrib nepi ka waktu isya kuring  ngaji di masjid eta. Nu ngawurukna, ajengan ,sok di sebut si Abah. Umurna mah kuring leuwih tujuh puluh taunan. Pangawakanana  pendek dedepe, sorana ngosom semu handaruan. Kana udud nyandu kacida, da sabot ngawuruk teh teu eureun-eureun roko napel dina bahamna. Mun keur ngawuruk teu weleh ngenyod udud  atawa ngetrukeun calacah kana asbak nu aya hareupeunana.

Pun bapa   mah ajrih temenan ka  Abah teh. Elmuna luhung cenah. Da sa kacamatan mah moal aya nu ngabandingan kana elmu agamana, utamana kana tafsir. Di masjid eta, abah bisa di sebut “imam besar na”. Kabeneran we da bumina ngarendeng jeung masigit, malah rek sasuhunan pisan. Jadi munasabah mun aya wae di masjid teh. Saban waktu anjeuna ngimaman di eta masjid. Sakapeung mun keur kebeneran aya halangan , pun bapa nu sok kapeto ngimaman teh, nu sejen mah tara aya nu wanieu n lantaran mun kurang paseh  bacaan solat  sok digengeunggeureuhkeun.

Kuring jeung babaturan ngaji di wuruk ku Abah teh utamana dina ngaderes juz ama, jeung diajar tajwid. Carana, maca saayat, tuluy   eta ayat teh diterangkeun tajwidnya. Nu kitu teh ngran a praktikum, ceuk istilah Abah mah. Cindekna ngalarapkeun tajwid langsung tina quran, bari di lagukeun. Metode nerangkeun tajwidna ge kawilang simpel. Contona, mun nerangkeun hurup qolkolah teh cukup disebut “baju di toko” anu hartina huruf kolkolah teh nya eta “ba” “jim” “tha” jeung “qof”. Ku cara kitu, gancang kahartina. Di sagedengeun tajiwid ge kungsi ngilu  ngulik nahwu shorof, ngan eta mah rada beurat, kakara apal  teh ngan istilah  fi’il madhi, fi’il amr,  jeung fiil mudore. Teu junun ngaji teh, loba gogoda na, jeung nu poko mah hoream we deuih. Jeung deuih   mun keur ngaji sok loba nu nyampeur lalajo bioskop misbar.

Nyelang tina ngawuruk ti Abah sok ngajarkeun lalaguan atawa pupujian. Salah sahiji pupujian teh kieu unina “Man taroka sholatan khomsi , abdan muta’amilah, faja uhum, fajaja uhum, jahaman kholidan piha” tuluy we di tarjamahkeun “Saha jalma nu ninggalkeun sholat, lima waktu bari dihaja, mangka di bales, mangka di bales, dilanggengkeun di naraka jahanam”. Asa genaheun tah pupujian teh. Beres ngaji teh sok ngahaja eta pupujian teh di haleuangkeun patarik-tarik, malah sakapeung sok bari rerengkenekan, ku Abah tara di geunggeureihkeun, ngan mun geus kamalinaan sok di sentak.

Bakat ku mindeng mah dinyanyikeun eta pupujian teh geus apal deui. Malah basa kuring geus nincak dewasa eta pupujian teh sok di hariringkeun keneh. Ngan ayeuna mah tara di barung ku rerengkenekan, komo palebah  kalimah nu panungtung mah “mangka di bales, dilangengkeun di naraka jahanam” mah sok ngadadak hate teh ngaleketey malah kadituna mah sok rada ngahuleng , kalan-kalan sok teu karasa bedah cimata. Mun emut kana eta pupujian, ras  oge emut ka Abah nu tos lami ngantunkeun . Kadieunakeun , saban talangke ari jeung hoream solat teh, raray Abah nu keur ngagalindengkeun “ man tarokka..” sok eces nembongan.

Fikmin # Mas Sampah#

Euweuh nu apalaeun ngaran aslina, di landih Mas Sampah teh bane wae pagaweanana mulungan runtah di RW. Sabulan sakali meunang gajih tina uduna warga. Dumukna di sosompang masigit, nyorangan. Teu anak  teu bojo, estu nunggeulis. Minggu harita Mas Sampah kalintang sibukna, pedah rek aya lomba kebersihan tingkat kacamatan. Isuk sore ngadorong roda runtah pulang anting. Awak nu regeng ketingali beuki begung, katambah deuih panyakit asma na sok remen jadi ari gawe beurat teuing teh. Sabada beres di peunteun di umumkeun dina speker masjid ku ibu RW  yen kebersihan di eta  RW pinunjul juara kahiji sakecamatan. Beres ngumumkeun, soloyong Ibu RW teh ka sosompang masjid panasaran pedah si Mas Sampah geus dua poe teu tembong. Diketrok sababaraha kali euweuh nu nembelan, Ibu PKK maksa asup ka sosompang nu rupek. Kasampak Si Mas Sampah keur nangkuban, sabada di guyahkeun awakna oyag kabeh, Bu RW ngoceak, bari teu lila ngucapkeu n “Inna lillahi waina ilaihi rojiun”

Fikmin #Robot Spiderman#

Geus meh sajam Wawan ngajanteng hareupeun toko, nyerangkeun robot Spiderman dina kaca. Sabot kitu leungeuna ngodok saku, pasti moal pimahieun pikeun meuli robot spiderman. Ladang nyemir sapatu tara aya sesana, kabeh di bikeun ka indungna. Sesana paling di pake jajan. Saban manehna ngaliwat ka toko cocoan di lebah pengkolan, pasti manehna nangtung dina hareupeun kaca toko. Harita, basa manehna ngaliwat robot the euweuh. Sabot ngalieuk ka jero, budak lalaki pantar manehna keur nanangkeup robot Spiderman bangun nu agul jeung bungah. Ti harita mun pareng Wawan ngaliwat ka toko cocoan lebah pengkolan mun pareng ngalieuk ka lebah kaca, hatena sok ngadadak nyeredet .

Fikmin #Bangke Anjing Hareupeun Istana#

Fikmin #Bangke Anjing Hareupeun Istana#

Geus rek saminggu eta budak lalaki nu kira-kira umurna  dua welas taun nangtung hareupeun Istana Presiden. Bajuna keuleuheu awakna rudin, beungeutna oge katembong kanyos. “Jang, keur nanaon di dieu “ ceuk Paspampres 

“Kuring  rek nepungan presiden” tembalna.

“Presidenna ge euweuh keur ka luar nagri”…. Na rek naon kitu ka presiden?” .

“Kuring rek nanyakeun naha bengsin rek naek?”

“Enya…” tembal Paspampres.

“Euh mun kitu mah nya kumaha nasib kuring, adi-adi kuring jeung  indung kuring . Ayeuna ge kuring jeung kulawarga  pan susah kacida” ceuk eta budak.

“Jig we atuh tepikeun  ka DPR, tuh belah ditu…tah   ieu ongkos keur naek Kopaja, sesana mah pake dahar we”

Dua poe ti harita di hareupeun Istana gujrud bari nutupan irung. “Bangke anjing bangke anjing !” cenah bari nunjuk bangke nu ngalumuk di hareupeun istana. Salah saurang Paspamres geuwat neangan karung tuluy nyampeurkeun bangke nu di tutupan ku koran. Barang di buka eta Pasamres teh ngahuleng, ningali  budak lalaki umur dua  welas taun  , dina saku katembong aya duit sapuluh rebu. 

Fikmin #Ulama Kahot#

Lembur kuring katelah Kota Santri. Bubuhan di lembur teh aya ulama kahot anu kawentar ka mana-mana. Nu pang onjoyna teh dina widang qiroat. Ti mamana, loba  nu ngadon tolab elmu di lembur kuring seja neuleuman elmu qiroat. Sabada jaman repormasi, aya perobahan nu tumiba ka ulama ahli qiroat tea. Ti ditu ti dieu jul jol nu  ngadeukeutan sangkan  ulama kahot teh daek ancrub kana widang politik. Nu di palar sangkan katokohan eta ulama bisa  ngaronjatkeun sora eta parpol. Ti harita eta ulama mindeng  gunta ganti parpol, ti parpol A tuluy ka parpol B, tuluy ka parpol C. Kadieunakeun mah katingali pamor eta ulama teh geus mimiti  surem nu antukna nepi ka teu kacaturkeun deui aya di parpol mana. Saprak asup ka parpol pasantren teu ka urus. Dina ka urusna ge ngan ukur dijadikan ajang kampanyeu. Minggu kamari di lembur gujrud sabada manggih beja, aya jajaka nu katewak  ku razia Satpol PP di hiji hotel, si horeng eta jajaka teh anak bungsuna  ulama kahot.